A Xunta de Galicia, a Universidade de Vigo e o Consello Superor de Investigacións Científicas (CSIC) desenvolverán un proxecto para a detección temperá da Covid-19 en estacións depuradoras. Esta iniciativa permitirá facer un seguemento a unha poboación que suma en total máis de 110.000 habitantes. As depuradoras seleccionadas son as de Baiona, Nigrán, Gondomar, Cambados, Moraña, Porto do Son, Muros, Melide, Ares e Cedeira; todas xestionadas por Augas de Galicia.
Hoxe, 23 de xullo, a directora de Augas de Galicia, Teresa Gutiérrez, mantivo un encontro cos representantes dos organismos que rubricaron o convenio: a conselleira de Infraestruturas e Mobilidade, Ethel Vázques Mourelle; o de Sanidade, Jesús Vázques Almuiña; o reitor da Universidade de Vigo, Manuel Joaquín Reigosa; a representante do CSIC, Rosina López Alonso e os representantes das empresas operadoras de auga, Geseco e Copasa. O orzamento do proxecto ascende a case 70.000 euros e contará cun prazo de execución de 3 meses.
O proceso de análise permitirá, mediante técnicas avanzadas, detectar a presenza do virus a través de feces, augas residuais e especies acuáticas e sedimentos (bioindicadores mariños). Tomaranse as mostras no entorno do vertido final prestando atención tamén á posible detección de carga viral en animais de roca e batea próximos ás depuradoras. O proxecto proporcionará unha información fundamental sobre o estado da pandemia, permitindo unha detección prematura dos posibles rebrotes.
As tarefas de investigación conxunta xa comezaron en maio nas instalacións de Cambados, Nigrán e Baiona, seleccionadas polo incremento de poboación nos meses estivais. Ata agora, tomáronse 168 mostras entre os meses de maio e xuño en diferentes partes das depuradoras e das zonas de vertedura así como de bioindicadores próximos ás saídas da auga tratada. Os resultados das análises completadas en 77 mostras resultaron negativos na presenza de coronavirus.
Outros proxectos
A Consellería de Infraestruturas, a través de Augas de Galicia, tamén forma parte dun proxecto en colaboración coa Universidade de Santiago de Compostela e as empresas operadoras da auga no que está a rastrexarse a presenza do virus en augas e lodos de depuración de sete estacións depuradoras en Vigo, Ferrol, Viveiro, Lugo, Ourense, Santiago de Compostela e Ribeira.