Sobre o escenario da Casa da Cultura de Viana do Bolo representarase o vindeiro domingo 18 de novembro a obra de teatro “Invisibles” da compañía Redrum. Esta peza, dirixida por Marián Bañobre, é un espectáculo “de creación colectiva a partir da novela homónima de Monste Fajardo, que presenta ante o público diversas historias cun fío común entre elas: a violencia de xénero”, segundo a propia compañía.
Esta interpretada por un elenco de tres actrices: Mela Casal, Sheyla Fariña e Nieves Rodríguez. A obra fai unha “exposición de historias reais protagonizadas por mulleres galegas, historias sobre malos tratos, algunhas delas xa coñecidas polo público pola súa repercusión mediática. A pretensión fundamental deste espectáculo é concienciar e sensibilizar ás espectadoras e aos espectadores con esta secuela que invade a sociedade”, din dende a compañía.
Esta obra forma parte do programa de actividades deseñado polo Concello de Viana do Bolo con motivo do 25 de novembro.