Unha mañá fresca e soleada tiñan os participantes na 4ª edición do Gran Premio de Montaña Galitiming da Rúa, celebrada o 29 de setembro.
Malia ser os últimos en saír, eran os participantes no mini trail os primeiros en completar o percorrido de 15 km polos montes da Rúa. O primeiro en cruzar a liña de meta en Fontei era Álvaro Suárez seguido por Fernando González e Adrián Blanco. Na categoría feminina a primeira clasificada era Greis da Rocha (Andamos a tercios), a segunda Leticia Seguin (A.D. Limiactiva) e a terceira Mónica Carnero (Castro-Trail). Nesta carreira había xente de diferentes partes de Galicia e tamén de Valdeorras con corredores independentes como Adrián Fernández e de clubs como o Peña Trevinca Barco.
O trail de 33 km saía do mesmo punto pasadas as 9:20 da mañá, e case catro horas despois Iván Redondo (A.D. Jarnachas) cruzaba a liña de meta. O segundo clasificado era Miguel Portal (A.M.E. Bestarruza) e o terceiro Francisco Rodal (Sada Montaña). Na categoría feminina non había sorpresas. Unha das novidades da proba era a asistencia da atleta ourensá Esther Hernández Pereira (Club WAA Team), a primeira muller na Transgrancanaria 360º 2019 que tampouco defraudou na Rúa subindo ao alto do podio aínda que só corrían dúas mulleres. Cristina Gaisse era segunda.
Fotos cedidas