Cunha emotiva homenaxe ao barquense Jesús Rodríguez León comezaba na tarde do 15 de setembro a entrega de premios do 52º Descenso do Sil Memorial Julián Trincado no Paseo do Malecón do Barco. Este padexeiro, triunfador tamén este ano en K-1 sénior, sumaba ademais a súa 25ª participación nesta regata. A organización proxectaba un video no que podían verse diversas imaxes da súa evolución como piragüista e da súa relación co Descenso do Sil. Despois recibía un ramo de flores de man do concelleiro de Deportes do Barco, Aurentino Alonso, e da concelleira Sabina Aguado.
A continuación, comezaba a entrega de premios propiamente dita. Nesta edición o Fluvial Barco lograba un total de catro podios na competición. Destacaba o título en K-1 sénior de Jesús Rodríguez, así como o terceiro posto nesta mesma categoría de Antonio Girón. En K-2 sénior a embarcación de Bernardo Sánchez e Sergio Ruiz facíase co segundo posto, mentres que en K-2 veteranos Miguel Ángel González e Roberto Núñez lograban tamén o subcampionato no Sil.
Outro título valdeorrés viña da man de Kissy Torres que quedaba primeira en K-2 veteranas, nunha embarcación do Fluvial Avión na que competía xunto a Mónica Piñeiro.
Fotos: A.R.
Máis información e fotos do descenso:
https://osil.info/o-descenso-do-sil-conquista-ao-publico/
https://osil.info/o-piraguista-barquense-jesus-rodriguez-invencible-no-descenso-do-sil/
https://osil.info/o-tren-fluvial-do-descenso-do-sil-enchese-na-estacion-do-barco/