Cuns destacados resultados volvían os atletas das Escolas Deportivas de Trives, que compiten como filiais do Club Adas do Barco, do XXV Memorial “Alejandro Lorenzo” – Campionato Xunta de Galicia de Campo a Través de Menores, que se disputaba na mañá deste domingo na Pobra do Caramiñal (A Coruña).
Entre eses resultados destacaba o de José Hervella, atleta de Manzaneda, que se convertía en subcampión galego de cross en categoría Sub12, cunha marca de 05:04. Ademais os seus compañeiros Marcos Basalo e Paulo Efrén Martínez conseguían a quinta posición galega por equipos.
“Hoxe os nenos fixeron un gran esforzo, xa que ademais tivemos que madrugar moito posto que a carreira celebrábase na Pobra do Caramiñal, pero mereceu a pena, eles nunca defraudan”, asegura o adestrador das Escolas Deportivas de Trives, Tino Sierra.
Fotos cedidas.