Continúa o ciclo semestral de webinarios de divulgación sobre figuras relevantes en Galicia durante a Idade Media que promove o Instituto de Estudos Galegos Padre Sarmiento (IEGPS), centro mixto do Consello Superior de Investigacións Científicas (CSIC) e a Xunta de Galicia.
A seguinte cita do programa terá lugar mañá 16 de marzo ás 17.00 horas, a través da plataforma CONECTA do CSIC. As persoas que se inscribiron previamente a través de divulgacion@iegps.csic.es poderán asistir á sesión impartida por Mª Gloria de Antonio Rubio titulada “ Judá Pérez, xudeu, veciño de Ourense”.
Este webinario centrarase na figura de Judá Pérez, xudeu, que viviu en Ourense nos anos finais do século XV, e cuxa figura serve como fío condutor para coñecer a distribución dos xudeus pola cidade, a súa organización, as profesións que exerceron, así como outros acontecementos excepcionais tales como o seu excomunión e posterior conversión.
A relatora é axudante de investigación no IEGPS e está doutorada en Xeografía e Historia pola Universidade Nacional de Educación a Distancia coa tese “As comunidades xudías en Galicia, séculos XI- XV”. Recibiu o Premio Samuel Toledano (2008), outorgado por Centro para a Investigación e o Ensino do Legado do Xudaísmo Sefardí e o Oriental de Xerusalén, polo libro “Os xudeus en Galicia (1044-1492)”, publicado pola Fundación Pedro Barrié de la Maza no ano 2006.
Na súa produción científica cabe citar, entre outros, os libros “Xudeus e Inquisición en Ribadavia” (2009), “Os xudeus de Ribadavia. A xudería de Ribadavia e os seus personaxes nos séculos XIV- XV” (2004) ou “Os xudeus en Galicia” (2004), o que se completou coa publicación de numerosos artigos en revistas -Cadernos de Estudos Galegos, Sefarad ou E-Humanista conversos- e capítulos de libro en publicacións nacionais e extraeses – Cilengua, Universidade de Córdoba, Monografías de Cadernos de Estudos Galegos, Harrassowitz (Alemaña) ou Edições Almedina (Portugal)-.
O programa previsto, que inclúe outros tres relatorios, continuará o vindeiro 20 de abril con Francisco Javier Pérez Rodríguez (Universidade de Vigo) que falará sobre “Lope de Mendoza, arcebispo de Santiago”.
Os webinarios diríxense ao público en xeral, pero preferentemente aos estudantes universitarios predoctorales, quen poderá solicitar un certificado de asistencia recoñecido como formación complementaria nos programas de doutoramento.
