Se por algo se caracterizan as festas do Cristo no Barco de Valdeorras é pola variedade en canto a actividades e tamén en canto ao público ao que van dirixidas. Pero non é menos certo que cada ano, en cada programación, o apartado musical cobra especial relevancia, destacando entre tódalas actuacións a dun grupo de referencia a nivel nacional.
O ano pasado eran os míticos Seguridad Social os que facían vibrar ao público valdeorrés e este ano será La Fuga, banda de rock de Reinosa (Cantabria) quen se achegue ata O Barco para conquistar ao público cos seus potentes sons.
Dentro da xira “Mas de cien amaneceres” coa que están percorrendo a xeografía española, La Fuga dará un concerto na praza Andrés de Prada o sábado 12 de setembro a partires das 23:45h.