Leve repunte de casos activos de coronavirus na provincia de Ourense. Así, segundo a última actualización de datos da Consellería de Sanidade (ás 18h. do 30 de outubro), a Área Sanitaria de Ourense, Verín e O Barco ten 1.397 casos activos, 3 máis que onte. Deles, 65 están hospitalizados en planta (6 menos que onte) e 20 en UCI (1 máis que onte). Ademais soben os novos casos confirmados por PCR nas últimas 24 horas, un total de 91 (fronte aos 54 de onte).
En canto ás cifras de ingresos, o Hospital de Valdeorras mantén 9 os pacientes con Covid-19 en planta no centro barquense, mentres o Hospital de Verín baixa a 4 pacientes en planta (3 menos que onte) e o Hospital Universitario de Ourense 52 en planta (4 menos que onte) e 18 na Unidade de Coidados Intensivos (1 máis que onte). Ademais o Centro Médico El Carmen ten un ingreso en UCI e a Clínica Santa Teresa outro.
O total de casos rexistrados na provincia ascende a 6.405, con 4.773 curados e 235 falecidos. Polo de agora lévanse realizado 92.862 probas PCR.
8.762 casos activos en Galicia
A Dirección Xeral de Saúde Pública da Consellería de Sanidade informa que na última actualización, o número de casos activos de coronavirus en Galicia é de 8.762 deles 1.473 son da área da Coruña, 894 da de Lugo, 1.397 da de Ourense, 918 da de Pontevedra, 1.924 da área de Vigo, 1.349 da de Santiago, e 807 da de Ferrol.
Do total de pacientes positivos, 69 están en UCI, 405 en unidades de hospitalización e 8.288 no domicilio. Polo de agora, en Galicia hai un total de 26.900 persoas curadas, rexistrándose 910 falecementos. O número de PCR realizadas é de 682.669.
