As comisións informativas da Deputación de Ourense celebran as súas reunións no Pazo Provincial, xuntanzas nas que analizarán temas de cooperación, transparencia, cultura e economía. Mañá, xoves 19 de novembro, na comisión de Cultura darase conta da incoación do expediente de concesión da Medalla de Ouro da provincia de Ourense aos integrantes do grupo musical Los Suaves.
O presidente da Deputación, Manuel Baltar, xa dera a coñecer a proposta no mes de outubro, durante a audiencia cos integrantes e o representante do grupo musical aos que calificou como “os mellores embaixadores de Ourense no ámbito musical”. Nese momento Baltar asegurou que se trata “dun recoñecemento á súa traxectoria, á súa personalidade musical e a súa permanente identificación con Ourense, presumindo de ourensáns aló por onde van”.
O grupo, que se atopa facendo a súa derradeira xira, recibiu o ofrecemento do presidente do goberno provincial “para que estes 35 anos de música de Los Suaves rematen cun concerto na nosa provincia, para o que contarán coa colaboración da Deputación de Ourense co fin de acoller un gran evento que realce a súa traxectoria e que sirva para vencellar a este grupo musical de Ourense para sempre coa súa provincia”.
