Lourizán confirma a existencia de clons híbridos de castiñeiro resistentes á avespiña

Achegará estes resultados mediante a publicación dun tríptico divulgativo para que o sector poida dispoñer desta información dun xeito máis detallado

Castiñeiro afectado pola praga da avespiña./ Foto: Carlos G. Hervella.

Durante unha nova solta de Torymus sinensis, desta volta na localidade lucense de Baralla, a conselleira do Medio Rural, Ángeles Vázquez, anunciaba este martes 12 de xuño que, a través do Centro de Investigacións Forestais (CIF) de Lourizán, logrouse confirmar, mediante ensaios controlados en laboratorio, que existen clons híbridos de castiñeiro que resisten a praga da avespiña. “A identificación destes híbridos resistentes ou tolerantes é fundamental para a elección dos materiais xenéticos de reprodución en viveiro e tamén é aplicable ás novas plantacións”, tal e como se indica dende a consellería.

No CIF de Lourizán instalouse no ano 2015 un insectario-invernadoiro para poder traballar con pragas e avaliar a tolerancia de distintos materiais. A continuación, fóronse incluíndo materiais xenéticos que foron sometidos a un elevado grao de ataque mediante infestación obrigada. “As avaliacións e análises estatísticos mostran que existen clons híbridos de castiñeiro resistentes ao ataque da avespiña, algúns deles moi empregados no sector e que son tamén ben valorados pola súa resistencia á tinta”, informan dende Medio Rural.

As 24 variedades tradicionais produtoras de castaña avaliadas ata o momento no CIF de Lourizán foron sensibles ao ataque da avespiña do castiñeiro. Sen embargo, algunhas delas mostraron un menor nivel de infestación, e por tanto un maior nivel de tolerancia, como foi o caso de ‘Amarela’ ou ‘Amarelante’, ‘Garrida’, ‘Negral’ e ‘Porteliña’. Debe terse en conta, en todo caso, que estas conclusións deben ser confirmadas no seguinte ano de infestación e contrastados en campo, indica Medio Rural.

En breve,  o Centro de Investigación Forestal de Lourizán achegará estes resultados mediante a publicación dun tríptico divulgativo para que o sector poida dispoñer desta información dun xeito máis detallado. Nel incluíranse ademais datos contrastados de ditas coleccións en campo, principalmente no caso das variedades tradicionais no que se está avaliando o grado de infestación na plantación da colección de variedades localizada en Sergude (Boqueixón).

Este traballo no eido da xenética complementa a loita biolóxica, que se está a realizar nestes días coa solta de Torymus, un insecto depredador natural da avespiña. Nos territorios de Lugo e Ourense é onde máis soltas se levaron a cabo nos dous últimos anos, tendo en conta a importancia que ten o cultivo da castaña en ambos casos.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies