O xurado do Concurso de fotografía “Olladas de Igualdade” reuníase na tarde do 7 de marzo para elixir os tres mellores traballos desta primeira edición, convocada polo Concello da Rúa con gallo da celebración do Día Internacional da Muller o 8 de Marzo.
Sobre a mesa encontrábanse oito traballos de entre os que saía o primeiro premio, que lle correspondía a Luis Sánchez da Rúa pola fotografía “Na leira”. O segundo premio era para Javier Yornaz de Pamplona por “Torneo en igualdad”, mentres que o terceiro recaía en “Olladas de igualdade”, unha imaxe presentada por María del Carmen Fernández Prada do Barco.
Os traballos participantes reuniranse nunha mostra que poderá verse en breve. Coa organización deste certame o Concello da Rúa busca “visibilizar o traballo da muller tanto o realizado de xeito remunerado como o non remunerado, así como destacar a necesidade da igualdade laboral entre mulleres e homes”.