Trinta anos da súa vida ten destinado Obdulia Rodríguez “Lula” de Gundivós a recupearar e dar a coñecer a olería tradicional desta zona lucense. En recoñecemento e ese labor esta veciña de Sober de 90 anos recollía na mañá do 18 de decembro en Santiago o Traxectoria 2017 de “Artesanía de Galicia”, nun acto que estivo presidido polo conselleiro de Economía, Francisco Conde.
Trátase dun galardón honorífico, sen dotación, e que pretende recoñecer a carreira profesional, así como a contribución do premiado á promoción da artesanía. A candidatura desta oleira foi presentada polo Concello de Sober. O alcalde, Luis Fernández Guitián, acompañou á premiada e na súa intervención fixo unha loubanza e recoñecemento a Lula e aos oleiros de Gundivós.
Lula procede dunha familia de oleiros e representa á cuarta xeración. Comezou aos 12 años neste labor artesán e reiniciou o seu traballo en 1981 coa primeira Feira do Viño de Amandi, ao seu regreso da emigración.
“Hoxe con 90 anos segue a representar os valores da xente humilde e traballadora desta comarca de oleiros. Tamén é símbolo da muller do rural e exemplo de traballo e superación”, segundo se destaca dende o Concello de Sober.