A residencia de maiores de Muíños, ubicada no lugar de Mugueimes, xa está un paso máis cerca da ampliación que a dotará de 59 prazas. O alcalde do municipio, Plácido Álvarez, asinou esta mañá un convenio de colaboración co conselleiro de Política Social, José Manuel Rey Varela, para o financiamento das obras. Neste senso, o titular autonómico sinalou que isto é posible como “un dos froitos da coordinación entre a Xunta de Galicia e os entes locais para coordinar a atención social dos cidadáns galegos”.
O centro comezouse a construír en 2006 polo Concello e leva funcionando dende o 2014. Agora, con esta ampliación que financiará a Xunta en parte, a través do Consorcio Galego de Servizos de Igualdade e Benestar, a residencia pasará de 40 a 59 prazas. A colaboración materialízase en 150.000 euros a xustificar entre as anualidades 2016, 2017 e 2018.