Un ano máis o Concello do Barco súmase á iniciativa europea da mobilidade con actividades orientadas a incentivar o uso da bicicleta e diminuír o do coche, no núcleo urbano. Por iso o acto central será a bicicletada “O Barco sen coche” prevista para o mércores 18 de setembro. A marcha terá saída ás 19:30h. dende o inicio do carril bici no paseo do Malecón, rematando na praza do Concello onde haberá agasallos para os participantes, sorteos e xogos inchables.
Por outra banda, dentro do sorteo de agasallos da campaña “usa a bici” farase entrega dun premio entre os novos usuarios do sistema de préstamo de bicicletas (altas de setembro de 2013 a setembro de 2014), e tamén entre os usuarios efectivos do sistema con máis de 10 usos de bicicleta no mesmo período.
O programa desta Semana Europea da Mobilidade no Barco presentábase en rolda de prensa na mañá do 16 de setembro, coa presenza do alcalde do Barco, Alfredo García, e do concelleiro de Medio Ambiente, Aurentino Alonso. Antes da bicicletada organizarase o día 17 de setembro un parque de educación viaria no Malecón (zona José Otero), cun horario de 18:30h. a 20:30h. para nenos de 8 a 12 anos, que poderán participar coa súa bicicleta e casco.
Dentro das medidas permanentes do programa, o Concello planea a creación de plans de mobilidade cidadá a pé e en bicicleta entre as zonas do concello e o hospital, os colexios e a casa do Concello. O programa inclúe asemade un xogo educativo para os centros escolares chamado “Papanatas move as túas patas”.
