Un total de 1.108 persoas participarán este domingo na primeira proba do circuíto de carreiras populares “Correndo por Ourense”, que terá lugar a partires das 12 horas polas rúas do barrio do Vinteún. Así o confirman os datos da organización tras o peche, o pasado mércores, das inscricións para participar na primeira das carreiras que percorrerán seis barrios da cidade entre abril e outubro.
O maior número de participantes (598) están inscritos na categoría absoluta cuxa saída está prevista para as 12:30h. e percorrerá unha distancia de 6 km. Na categoría de pitufos están apuntados un total de 252 participantes, que comezarán a súa carreira ás 12h. A distancia que percorrerán é de 100 metros.
Nas categorías de benxamín (sub 10) e de alevín (sub 12) están inscritas 176 persoas que realizarán un traxecto de 1.500 metros e que terán a saída ás 12:05horas.
En Infantil (sub 14) e cadete (sub 16) están apuntados 75 atletas que percorrerán 2.400 metros a partires das 12:15 horas. E na categoría xuvenil (sub 18) están apuntadas sete persoas que percorrerán 6.000 metros dende as 12:30 horas.
A saída estará situada na rúa Madre Soledad e o circuíto completo percorrerá a rúa Madre Soledad, avenida de Santiago, rúa do Vinteún, Río Corzos, Río Mao, Río Cobas, Río Camba, avenida de Santiago, rúa do Vinteún, Río Corzos e remata no punto de saída na rúa Madre Soledad.
