Un total de 334 atletas competirán o vindeiro domingo, 4 de febreiro no “Cros de Ribadavia” 2018, competición de atletismo de campo a través que se disputará nun circuíto que transcorre na Área Recreativa da Veronza. Esta proba foi presentada hoxe, 1 de febreiro, no “Marcos Valcárcel”.
A proba abrangue o LXXXIII Campionato de Galicia Absoluto de Campo a Través de Homes, e o LI do Campionato de Galicia Absoluto de Campo a Través de Mulleres, “a proba atlética con maior prestixio de Galicia, que celebrou a súa primeira edición no ano 1916”, salientou o director do Cros de Ribadavia, Lalo Gómez, destacando que “se darán cinta os mellores especialistas do medio fondo e fondo de Galicia”. Tamén se disputarán o LI Campionato de Galicia Sub23 Homes, o XXXVI Campionato de Galicia Sub23 Mulleres, o LI Campionato de Galicia Sub20 Homes, e o XXXVII Campionato de Galicia Sub20 Mulleres.
Pola súa banda, o asesor de Deportes da Deputación, Bernardino González, dixo que se trata dun dos “campionatos máis antigos de Galicia que vai xa pola súa 83ª edición”, e agradeceu á Federación Galega de Atletismo que confíe novamente “na provincia de Ourense para acoller un evento deportivo desta índole, que resulta atractivo para participantes e para asistentes”.
A proba deportiva, que comezará ás 10:30 horas, está incluída no calendario oficial da Federación Galega de Atletismo. O presidente da Federación Galga de Atletismo, Isidoro Hornillos dixo que Ourense “albergará outra das citas estrelas dunha disciplina deportiva que historicamente deu grandes éxitos ao deporte galego”, e destacou que Ourense, ademais de ser a provincia termal, “tamén é a provincia atlética porque está a converterse nun referente neste ámbito en Galicia e no resto de España”. Pola súa parte, o concelleiro de deportes de Ribadavia, Ricardo González, agradeceu que Ribadavia “acolla por quinto ano consecutivo esta proba”, mentres que o coordinador de deporte escolar do servizo provincial de Deportes da Xunta, Manuel Pérez, destacou que este tipo de eventos “poñen en valor o deporte na provincia de Ourense”.
