En portadaGalerías de fotosÚltima hora

Máis dun cento de participantes na IX Andaina de Manzaneda, III BTT e II Trail

Nesta edición este evento incluía sete probas diferentes: un percorrido curto e un longo para camiñantes e corredores e tres diferentes para os ciclistas

A chuvia aparecía como convidada inesperada na IX Andaina de Manzaneda (AdeM) que se desenvolvía ao longo da mañá do domingo 4 de novembro. Sen embargo, non desanimaba ao total de 103 persoas se daban cita nesta edición que contaba con ata sete probas diferentes: unha camiñata curta (16 km) e outra longa (20 km), un trail curto (16 km) e outro longo (20 km), así como con tres percorridos de BTT (un de 27 km, outro de 35 km e un terceiro de 45 km).

Os primeiros en tomar a saída dende o patio da escola da vila de Manzaneda eran os 62 andaríns ás nove da mañá, seguidos ás nove e media dos 21 ciclistas. Finalmente ás dez partían os 20 corredores. A xornada discorría sen incidencias de mención e no percorrido os participantes dispoñían de dous puntos de avituallamento no caso das citas de BTT, mentres que no trail e na andaina (cun trazado idéntico curto e longo) había un.

Para velar pola seguridade e polo correcto desenvolvemento destas activdades deportivas a organización, en mans do Concello de Manzaneda, contaba coa colaboración dos voluntarios das agrupacións de Protección Civil de Manzaneda, Petín, A Rúa e Maceda, así como co apoio da Cruz Vermella de Ourense e do grupo de moteiros triveses M10 Enduro Team.

 

Ceferino Rodríguez, que colaborou coa organización desta AdeM, na proba de BTT./ Foto: Carlos G. Hervella.

Ás dúas da tarde xa chegaran a meta (tamén no patio da escola de Manzaneda) o total dos participantes e dábase paso a unha pinchada para eles e para os colaboradores no Hostal O Pendón da vila. Despois, tiña lugar un sorteo de diferentes agasallos doados por diversas empresas da zona, entre outros: 1 bono de estadía no Pazo da Pena, 1 bono de estadía na Estación de Montaña de Manzaneda, 1 bono para o Hostal As Maceiras, unha cea para dúas persoas no Hostal O Pendón (aboada por Castanval), 2 lotes de produtos de Embutidos Hervella, 3 lotes de produtos da Ladeira da Mata, 4 lotes de produtos de Bica de Raigada, 1 xamón e 1 queixo aportados por Instalacións Eléctricas Instalvima, 2 lotes de bicas de castaña da Cooperativa Amarelante e 30 chalecos reflectantes doados polo subsector de Tráfico da Garda Civil de Valdeorras.

E xusto antes do sorteo os presentes cantábanlle o “cumpreanos feliz” a dous participantes nesta cita deportiva que estaban de aniversario neste 4 de novembro. Dende a organización agradeceuse aos asistentes a súa participación nesta nova edición da AdeM, “en especial nun día no que non acompañou a meteoroloxía como foi o de hoxe”, así como ás diferentes agrupacións de Protección Civil que colaboraron, aos voluntarios da Cruz Vermella de Ourense, a todas as empresas que aportaron os agasallos do sorteo (e que aparecen no folleto publicitario da AdeM) e ao Periódico O SIL pola cobertura informativa deste evento.

Asemade faise un agradecemento especial, e así se manifestaba tamén tras a pinchada cun recoñecemento, a Ceferino Rodríguez Rodríguez, natural de Sobrado (Trives), quen desinteresadamente se encargou do deseño do circuíto de BTT, ademais de colaborar na súa marcaxe.

Fotos: Carlos G. Hervella.

Máis información e fotos:
https://www.osil.info/a-iii-btt-de-manzaneda-en-imaxes/

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close