O obradoiro de emprego que a Xunta concedeu á Mancomunidade de Concellos da comarca de Ourense botará a andar o vindeiro mes de setembro e contará cunha achega de 180.000 euros. Así llo trasladou onte a delegada territorial, Marisol Díaz Mouteira, aos representantes dos dez municipios integrantes: Paderne de Allariz, Maceda, Baños de Molgas, Nogueira de Ramuín, Esgos, San Cibrao das Viñas, Parada de Sil, O Pereiro de Aguiar, Xunqueira de Ambía e Xunqueira de Espadañedo. En total serán 20 as prazas que se ofertarán no programa, que contará coas especialidades de xardinería e albanelería.
“Terra de Mosteiros 2016” é un dos 20 talleres que o goberno autonómico destinou este ano para a provincia de Ourense. En total serán 400 os beneficiarios que poderán formarse e aprender nestes programas mixtos, que combinan clases teóricas con prácticas.
Neste caso, as principais actuacións que levarán a cabo os alumnos deste obradoiro será a restauración das pontes sobre o río Arnoia, no concello de Molgas; a ampliación da Escola Municipal de Música, en Maceda; o acondicionamento da Casa do Mármore, en Xunqueira de Ambía; e o acondicionamento e mellora dos lavadoiros de diferentes parroquias. Desenvolverase ao longo de seis meses.
O obxectivo desta iniciativa que se xestiona a través da Consellería de Economía, Emprego e Industria é “dar formación a persoas desempregadas para que logren reinsertarse laboralmente”, explicou Díaz Mouteira.
