Na mañá deste mércores 4 de agosto, a comisión organizadora do 18º Congreso Provincial do Partido Popular de Ourense acordaba por unanimidade proclamar a Manuel Baltar como único candidato á presidencia da formación, tras comprobar, tal e como establece o artigo 22 do regulamento, “que o precandidato reúne os apoios estatutarios e regulamentariamente requiridos”, condicións entre as que figuran conseguir un mínimo de 75 avais entre os afiliados, estar adherido ao partido desde hai máis de 12 meses e estar ao corrente do pagamento das cotas e aportacións por cargo.
A proclamación de Manuel Baltar como único candidato implica que non se convocarán asembleas para a votación de precandidatos entre os afiliados inscritos.
A comisión organizadora tamén acordou dar por convocada a campaña electoral interna para a elección do presidente dos populares ourensáns.
