Manuel Gómez-Franqueira Álvarez era nomeado na tarde do 24 de maio colexiado de honra do Colexio de Economistas de Ourense, nun acto que estivo presidido polo conselleiro de Economía, Francisco Conde.
Na súa intervención, Conde referíase ao Grupo Coren como arquetipo do galego que coopera, que une esforzos, que emprende e que busca mercados e alianzas. “Manuel Gómez-Franqueira é galego. Son galegos os 4793 cooperativistas. Galegos son os seus produtos. E galega é a sociedade que rodea e arroupa esta estrutura empresarial única en España, que recibiu no 2003 o premio de Mellor Empresa Agroalimentaria Española”, dicía o conselleiro, ao que engadiu que o novo colexiado pertence á familia que funda o que se pode bautizar como a Galicia cooperativa, como fórmula innovadora para desenvolver un proxecto industrial e tamén como maneira de entender as relacións humanas.
