Constrastar as principais conclusións do estudo de “Batefogo. Prevención de lumes forestais a través da intervención social” cos veciños de Manzaneda, ámbito de acción deste proxecto. Ese era o principal obxectivo do foro veciñal que se convocaba na mañá do 21 de maio no Centro Cultural de San Miguel. A reunión abríase coa intervención do alcalde de Manzaneda, David Rodríguez, quen lembraba que o lume e os incendios son “unha gran preocupación dos veciños deste concello, trátase de ver por que arde o monte e de buscarlle solucións”, aseguraba.
A continuación dous membros do equipo que elabora o proxecto explicaban a xénese deste proxecto e a fase na que está actualmente. “O groso do estudo está feito, pero o documento segue en proceso de elaboración”, matizaban. De feito, este foro buscaba recabar o punto de vista veciñal sobre a principais conclusións obtidas ata o de agora. Tamén se analizaban, tomando como referencia diversos mapas incluídos no estudo, cuestións como os lumes rexistrados dende o ano 2010 ata a actualidade en Manzaneda ou a distribución e tipoloxía de formacións forestais deste municipio ourensán de alta montaña.
Dese xeito, tras a exposición inicial, organizábanse grupos de traballo para analizar e comentar os diversos tipos de causas polas que arde o monte neste concello. Un dos membros do equipo, Miguel Pardellas falaba de dous tipos. Por unha banda, citaba ás causas “estruturais”, ligadas a cuestións como o despoboamento e avellentamento, o abandono do monte, a política forestal ou o cambio climático. Pola outra, apuntaba unaha serie de causas “circunstanciais” como as naturais, as neglixencias, queimas agrícolas, etc.
A intención é obter a través desta xuntanza un “estudo do territorio consensuado coa veciñanza e unha serie de propostas de traballo que, nun segundo encontro, concretaremos e detallaremos para poder levar á práctica”, segundo adianta o equipo de “Batefogo”.
Fotos: Carlos G. Hervella.