O Boletín Oficial da Provincia de Ourense (BOP) vén de publicar o anuncio de aprobación inicial da ordenanza municipal reguladora do “Bautismo Civil ou Cerimonia de Benvida Social ao concello” de Manzaneda, cuxo alcalde é David Rodríguez de Anova. Tras a súa publicación sométese o expediente a información pública para que poida ser examinado ou podan presentarse alegacións.
Esta ordenanza resultaba aprobada na sesión plenaria celebrada o pasado 2 de febreiro no Concello de Manzaneda. Deste xeito, Manzaneda convértese “no primeiro concello da provincia de Ourense en contar cunha regulación sobre os actos laicos de benvida á comunidade”, tal e como se destaca dende Anova.
O bautismo civil, laico ou republicano consiste nun acto de benvida á comunidade dun novo membro, que adquire unha serie de obrigas e dereitos. A cerimonia civil de outorgamento da carta de cidadanía compromete a pais, padriños ou titores a defender os dereitos do pequeno. Esta cerimonia está pensada para nenos ata os 6 anos.
Este bautismo civil, tamén denominado laico ou republicano, foi creado en Francia, en tempos da República, para contrapor ao acto relixioso un de carácter civil. Esta actitude foi a orixe do bautismo civil (Estrasburgo, 1790).
Na comunidade galega existen actualmente outros concellos onde xa está regulado o bautismo civil, segundo Anova: Guitiriz, Marín, Redondela e Oleiros, que foi o pioneiro en Galiza en 2008. Agora Manzaneda súmase a esa listaxe, sendo ademais o primeiro municipio ourensán que regula esta cerimonia.
No caso de que no prazo de exposición pública (de 30 días) non se presenten alegacións, esta ordenanza considerarase aprobada definitivamente.