Logo de 28 anos como alcaldesa, María del Carmen González Quintela (Carballeda de Valdeorras, 1955) afirma sentirse orgullosa do realizado “Non tiña outro obxectivo que facilitar a calidade de vida á veciñanza, con especial atención ao medio e o ámbito económico”, asegura. Nas vindeiras eleccións municipais de maio volverá a presentarse ao cargo encabezando a lista do PP “para seguir a traballar por un único proxecto que é o concello e o mellor que ten, que é o seu capital humano”.
Refírese a candidata á produción de lousa, pola condición de Carballeda como líder mundial. “Para nós era primordial equilibrar a extracción de lousa coa protección do medio e coa vida diaria dos habitantes, que nun gran número viven do seu traballo neste sector”.
Comenta ademais que “chegou o momento de centrarse noutras iniciativas máis relacionadas coas actividades de ocio e tempo libre”. Así, destaca, está a piques de finalizar un complexo de piscinas que combina as clásicas instalacións con outras naturais e que, pola súa novidade, esperamos capte a atención non só da xente de Valdeorras senón tamén do Bierzo”.
Cara un próximo mandato asegura querer “dar a batalla polo medio, con especial atención á recuperación do patrimonio natural, e contra o feísmo urbanístico coa eliminación de casas en ruínas e abandoadas “que ademais de contribuír a crear unha paisaxe pantasma e nada atraínte tamén son un foco de perigro para as persoas”.
O presidente provincial, Manuel Baltar, expresou entre tanto o seu agradecemento á candidata por se poñer unha vez máis a disposición do partido, ofrecendo o seu talante colaborador coas administracións e unha visión política “que vai máis aló do concello e da comarca, como así o demostra o novidoso complexo de piscinas que ven de citar”.
