Publicidade
PolíticaÚltima hora

María G. Albert: “Tentarei facer o posible para que os problemas de Valdeorras se escoiten no Parlamento galego”

A deputada electa do BNG afirmaba que hai tres cuestións a enfrontar de forma urxente: a extinción de lumes, a área sanitaria e o sector vitivinícola

O BNG de Valdeorras convocaba nesta mañá de 17 de xullo unha rolda de prensa para agradecer o apoio e os resultados acadados nas últimas eleccións do 12X e para adiantar as reivindicacións urxentes que ían trasladar ao Parlamento de Galicia.

O responsable comarcal da formación, Roberto Quiroga, quixo agradecer o apoio a votantes, afiliados, simpatizantes e ás persoas que trasladaron as súas reivindicacións. Ademais, puxo en valor o traballo da deputada ourensá Noa Presas “por vir e reivindicar, como se fora unha valdeorresa máis”.

Agradecéndolle a María González Albert o seu traballo e a súa responsabilidade, dáballe a palabra á parlamentaria electa. “Que sexa unha representante valdeorresa vaise notar. Tentarei facer todo o posible para que os problemas de Valdeorras se escoiten no Parlamento”, afirmaba.

 

Durante a rolda de prensa./ Foto: Alba Prada.

 

Albert adiantaba que o primeiro que levará ao Hórreo serán tres cuestións a enfrontar de forma urxente: a extinción de lumes, a área sanitaria e o sector vitivinícola. A primeira das reivindicacións “é o Pladiga, o tema da extinción de lumes que todos os anos supón unha problemática grandísima para a nosa comarca. Levamos cinco anos reclamando a motobomba da Rúa”. Tamén recordou a falla de helicóptero na base de Vilanova (O Barco) “levamos 15 días a temperaturas de máis de 35 graos e estamos sen helicóptero”.

Outra cuestión que defendeu foi a da desaparecida área sanitaria de Valdeorras, “ao PP non lle vai tremer o pulso para seguir recortando servizos no Hospital Público de Valdeorras”. Ademais quixo destacar a problemática do Centro de Saúde da Rúa “imos estar vixiantes para que se faga en base á planificación que estaba realizada, onde nin o Concello nin a administración teñan que asumir ningún custo”.

Así, a terceira das cuestións é o sector vitivinícola, polo cal María Albert defendía que había que poñerlle solución á saída do viño para que a colleita deste ano puidera entrar. “Aínda que é unha responsabilidade europea, a Xunta ten que implicarse”, recalcaba.

O lume en Pardollán (Rubiá)

Trala rolda de prensa, o BNG emitía un comunicado en relación co incendio de Pardollán (Rubiá), o cal leva en poucas horas 35 hectáreas queimadas. Nel recordaban a previa reivindicación do helicóptero para a base aérea de Vilanova, “malia a mobilización de medios aéreos e terrestres, o BNG lembra unha vez máis que o tempo necesario de arranque e desprazamento que precisa o helicóptero de San Xoán de Río (30 minutos), o de León (50 minutos) e o de Monforte (25 minutos) son de extrema importancia cando se detecta o incendio. Desde a base de Vilanova de Valdeorras eses minutos descenderían até 12”.

A deputada electa, María G Albert, defendía “a necesidade que ten esta comarca de ter un helicóptero na base de Vilanova, un problema que xa non é actual nunha comarca con altísimos índices de perigosidade, e nun distrito, o XIII, que tempada após tempada padece constantes recortes de recursos que, como todos os anos, lamentaremos”.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close