O Ministerio de Agricultura e Pesca, Alimentación e Medio Ambiente, a través da Confederación Hidrográfica do Miño-Sil, formalizou esta mañá o convenio de colaboración coa Deputación de Ourense e co Concello de Leiro para a financiamento e execución dunha senda fluvial na marxe dereita do río Avia en Leiro.
O acto foi celebrado no Salón de Plenos do Concello de Leiro, presidido polo delegado do Goberno en Galicia, Santiago Villanueva, e rubricado polo presidente da Confederación Hidrográfica, Francisco Marín, polo presidente da Deputación, Manuel Baltar, e polo alcalde de Leiro, Francisco José Fernández.
O obxecto deste proxecto é a recuperación dun tramo da senda, ubicada na marxe dereita do Avia, de 139 centímetros de lonxitude e que actualmente conta cunha pasarela de madeira apoiada en pilas de formigón cuxa estrutura atópase en moi mal estado de conservación, o que obriga ao seu peche e prohibición do paso pola mesma.
En canto ao proxecto, dende o Ministerio aseguran que o que fixeron foi “buscar distintas alternativas para repoñer a continuidade da senda deste tramo”. Finalmente, tras analizar as posibilidades, optaron pola demolición total da pasarela e a resolución da continuidade do paseo ocupando o espazo situado entre a coroación do muro que actualmente delimita a marxe do río neste tramo e os peches das fincas colindantes.
A primeira das actuacións consistirá na desmontaxe de todos os elementos de madeira que constitúen a actual pasarela, así como o seu mobiliario e instalacións, para proceder á demolición de todos os elementos de formigón armado que integran a súa estrutura e sobresaen da rasante do terreo e do fondo do río. Posteriormente executarase o novo tramo de paseo que se adaptará e integrará co terreo e topografía xa existentes.
O custo previsto para todas estas actuacións ascende a 310.000 euros e será sufragado nun 32% polo Ministerio, a través da Confederación Hidrográfica Miño Sil, o 20% restante aportarano o Concello de Leiro e a Deputación.
