Acontecemento de alto nivel deportivo esta fin de semana no encoro de Castrelo de Miño coa Regata Clasificatoria de Windsurf (incluída na Copa Deputación de Vela), na que se espera a participación de Tomás Vieito, membro do Selección nacional de IQ Foil. As probas comezarán o venres pola tarde con máis de 50 deportistas inscritos nun total de cinco categorías.
A regata é puntuable para o ranking galego de clasificación para os nacionais de 2022.
A frota galega de windsurf asiste ao evento de Castrelo de Miño con altas expectativas dada a previsión de boas condicións de vento. Haberá un total de 5 modalidades, Foil Formula, Windsurf Formula, Raceboard, Bic Techno 293 e Escola. Hai un total de 52 inscritos 12 en Formula Foil, 6 en Formula Windsurf, 5 en Raceboard, 13 en T293 e 16 en Escola representando a un total de 6 clubs galegos e ao alacantino C.N. Santa Pola con dous representantes na Fórmula Windsurf.
En Fórmula Foil espérase ver un gran espectáculo ao contar cun dos mellores regatistas do panorama nacional, o cangués Tomás Vieito que forma parte da selección nacional de IQFoil, unha modalidade que será olímpica nos Xogos de París 2024. Tomás terá duros rivais como o seu compañeiro de equipo do CN de Rodeira Nacho Fernández ou os sub-21 Nicolás Blanco e Lucas Maceiras que avanzan rápido para acadar o nivel absoluto.
O Club Náutico Castrelo de Miño será un dos clubs líderes cun total de catorce regatistas, 3 en Foil, 3 en Windsurf Formula, 2 en Bic T293 e 6 na escola. Entre todos eles, cómpre destacar a Nicolás Blanco que intentará loitar por un posto no podio de Formula Foil.
Esta regata forma parte do programa da Copa Deputación de Vela e conta co apoio da Real Federación Galega de Vela que enviará ao técnico responsable das categorías base, Juan Portela, para supervisar a evolución dos nenos e mozos que participan no Techno 293 con vistas a formar os diferentes equipos galegos.
O programa establece a disputa dun total de 6 mangas entre o venres e o sábado. O venres as probas serán entre as 18:30 e as 21:00 h. Mentres que o sábado pódense disputar mangas desde o mediodía ata as 20:00 h. como hora límite. A entrega de premios está prevista para as 21:00 h. do sábado.