Hai tempo que directiva e xogadores do C.D. Viana se queixan do mal estado no que se atopa o campo de fútbol municipal As Carrelas. Unha situación que cambiará proximamente xa que o Concello de Viana do Bolo vén de sacar a licitación o seu acondicionamento para o que destinaron un orzamento de 23.600 euros, tal como adianta o alcalde Secundino Fernández.
Nos próximos días adxudicarase a mellora e acondicionamento do campo que consistirán fundamentalmente na substitución do céspede mediante medios mecánicos; e a colocación dun novo sistema de rego automático enterrado que solucionará un dos principais problemas que tiña o campo; cuestión que dificultaba enormemente a conservación do céspede. “Con este novo sistema conseguirase un rego automatizado de todo o terreo de xogo e de paso necesitarase moito menos tempo de traballo para realizar esta operación do que se necesitaba co sistema antigo de regadores”, explica o alcalde. Por último mellorarase o terreo, aplicando unha capa de area e procedendo a unha nova sementeira. “Faranse tamén todas as operación post emerxencia do céspede, eliminando malas herbas, escarificando…”, co obxectivo de ter un campo nas mellores condicións para o comezo da liga 2018-2019 no mes de setembro.
O alcalde asegura que a proposta foi tratada coa directiva do C.D. Viana antes de proceder a sacala a concurso, amosándose “moi interesada e de acordo en mellorar as instalación da forma proposta polo goberno municipal” que xa actou nas instalacións nesta lexislatura “mellorando os vestiarios con calefacción, novas duchas, novo sistema de auga quente,…”