Galicia é a principal comunidade autónoma de España en cultivo e exportación de castaña, cunha produción que na última campaña superou os 20 millóns de quilos e un valor económico xerado de arredor de 70 millóns de euros. Así o destacaba a conselleira do Medio Rural, Ángeles Vázquez, na reunión que mantiña o 17 de febreiro o Consello Forestal de Galicia.
No seu decurso avanzábase na regulación das mesas da castaña e da madeira, órganos de coordinación e colaboración entre a Xunta e o sector destinados a impulsar un desenvolvemento sustentable destes aproveitamentos do monte, a través do seu fomento, regulación e promoción. A conselleira do Medio Rural, Ángeles Vázquez, resaltaba a importancia de ambas mesas para poñer en valor dúas das producións máis senlleiras do bosque galego.
Sobre a mesa da castaña, a titular de Medio Rural indicía en que ademais do valor económico deste sector, “o froito do castiñeiro ten na nosa comunidade un destacado valor social, ecolóxico e cultural, que tamén serán obxecto de atención nesta mesa”.
Con relación á madeira, Ángeles Vázquez, apuntaba a existencia dunhas 3.000 empresas en Galicia dedicadas a esta actividade, cunha facturación global que rolda os 1.750 millóns de euros e un volume de emprego, directo e indirecto, que se sitúa en aproximadamente 70.000 postos de traballo.