Máis de 2.000 persoas concentráronse hoxe, 24 de xaneiro, na Praza Maior de Ourense en defensa da Sanidade pública. Esta concentración prodúcese unha semana despois de que o persoal do Complexo ourensán leve pechado nas instalacións do Hospital para reclamar que non se pechen camas no novo edificio de Hospitalización, aberto recentemente, co obxectivo de recadar sinaturas.
Devandito peche xa rematou, segundo contou o representante do sindicato do CSIF Sanidade, José Benito González. Agora “imos seguir outra estratexia”, dixo, a través das concentracións. Actualmente, cifrou o representante sindical, hai máis de 15.000 sinaturas recollidas.
Nesta concentración estiveron presentes as diferentes forzas sindicais e representantes políticos. Entre eles o deputado de En Marea pola provincia no Parlamento de Galicia, Davide Rodríguez; os socialistas José Ángel Vázquez Barquero -grupo Municipal de Ourense-; o deputados provinciais Francisco Fraga e Susana Rodríguez e o representante da executiva local do BNG de Ourense, Luis Merca, entre outros. Así como representantes da plataforma SOS Sanidade Pública.
No manifesto que leron na concentración fixeron referencia á “privatización da sanidade” en elementos como “a informática, a xestión dos historiais clínicos…” Para avalar as súas verbas, amparáronse en diferentes organismos: “O Consello de Contas e a Organización Mundial da Saúde din que a privatización non produce melloras na atención dos pacientes nin aforro”.
A nova Lei de Saúde de Galicia foi outro dos puntos que tocaron. Concretamente recalcaron que vai supor “a perda da Área Sanitaria de Valdeorras, que suporá un déficit sanitario nesa zona da provincia”. Tamén falaron dese peche de camas na área de Hospitalización do CHUO reiterando a perda de calidade e de persoal. “De pouco nos valen os avances co 2050 coa súa tecnoloxía cando non hai camas”, dixeron. Recalcando o “colapso” nas Urxencias do CHUO “con pacientes nos corredores e con altas horas de agarda”.
No eido da Atención Primaria destacaron a “descapitalización” do servizo “tendo un 11% do orzamento cando os expertos recomendan un 25%”. E resaltaron a privatización de servizos en clínicas privadas “para baixar as extensas listas de agarda”.
A Unidade de Hematoloxía e a perda da Cirurxía Pediátrica as 24 horas son outros dos reclamos que consignaron, canda á perda de especialidades no Hospital Comarcal de Verín: “vanse contratar especialistas alleos ao Sergas a través dunha ETT”, aseguraron.
Tamén ofreceron o seu apoio aos traballadores de Ferrovial, concesionaria de limpeza do CHUO, que veñen de convocar unha folga indefinida para o 5 de febreiro.
Para o vindeiro 4 de febreiro haberá unha concentración, a nivel galego, en Santiago de Compostela.
Texto e fotos: Carlos Asensio.
