Centros hospitalarios de toda España lanzaron milleiros de bicos aos nenos hospitalizados no Día do Neno Hospitalizado. No Complexo Hospitalario Universitario de Ourense (CHUO) tamén se sumaron a esta iniciativa e lanzaron milleiros de bicos hoxe, 12 de maio, a eses nenos que pasan varios meses no hospital.
A xefa do servizo de Pediatría do Complexo ourensán, Susana Rey, reivindicou neste día que “hai que traballar entre todos para que a estancia dos nenos sexa a mellor posible cara a súa curación”. A doutora explicou que hai que facer “unha humanización dos coidados pediátricos”, é dicir, que o rapaz ingresado no hospital teña un ambiente parecido ao que teñen na casa, “xa que, por definición, un hospital é un entorno hostil”. Susana Rey tamén dixo que é moi importante “tanto atender aos pacientes infantís como ás familias”.
O CHUO, segundo explicou a xefa de Pediatría, diminuíu a súa hospitalización infantil nos últimos anos, a expensas das consultas externas da especialidade. O seu servizo, dixo, ten ingresados a pacientes de cero a 15 anos, “con todo o que iso supón de cara á asistencia e das necesidades dos pacientes”, explicou. En total, de media, o Complexo ourensán ten 50 nenos ingresados.
As infeccións soen ser as principais causas dos ingresos dos nenos. Pero hai dúas seccións que son nas que máis tempo pasan ingresados os rapaces, explicou a doutora. Tanto a sección de oncoloxía infantil como a de bebés prematuros son as máis salientables no eido do ingreso de nenos. Este foi o caso de Eva Fernández, voceira da Asociación Galega de Familias con nenos Prematuros (AGAPREM).
A voceira explicou que dentro da prematuridade hai distintos graos. No seu caso, por exemplo, “detectáronme unha infección no útero na semana 23”, e os médicos dixéronlle que se o bebé aguantaba até a semana 24, “teriamos que ir a Vigo”. Afortunadamente, aguantaron até a semana 25 e marcharon á cidade olívica a dar a luz. “Con todo o que iso supón, nós tiñamos outro fillo, é outra cidade”, dixo. Pero contou que nese momento “a incertidume é unha sensación que pode contigo e a min gustaríame ter falado cunha nai que tivera pasado polo mesmo ca min”, dixo.
Por este motivo, formou a asociación na que traballan cada sábado no CHUO. “Porque o acompañamento é importante e que nos teñan de referente as outras nais é o noso obxectivo primeiro”, asegurou. Dende esta asociación reivindican o uso do “método canguro”, é dicir, que o neno prematuro estea pegado á pel da súa nai ou do seu pai mentres está ingresado; así como a lactancia materna. Por este motivo, dende a súa asociación, mercaron unha neveira para o CHUO para crear un banco de leite, “porque en Vigo o teñen en funciona moi ben e en Ourense tiñamos que ter un”, explicou.
A súa historia, tivo un desenlace feliz, o seu fillo ten agora tes anos “e vai empezar o cole dentro de pouco”, contou, e non lle quedou ningunha secuela. Así é todo, esta e outras nais, colaboradoras na asociación, seguen a traballar para axudar a aquelas nais que teñen fillos prematuros.
Texto: Carlos Asensio.