Funcionarios e persoal laboral do Concello de Xinzo de Limia, encabezados pola alcaldesa Elvira Lama a quen acompañaban membros da corporación local, así como veciños e veciñas, gardaron un minuto de silencio ás 12 da maña deste 17 de setembro para “manifestar a total repulsa de todos os veciños e veciñas ante o triple crime machista acaecido no concello de Valga no día de onte”.
Antes de gardar o minuto Elvira Lama dirixiuse aos presentes para lembrarr que “tristemente volvemos concentrarnos diante do Concello para gardar un minuto de silencio, para rexeitar o triple asasinato no Concello de Valga. Triple asasinato outra vez, de mulleres, tres mulleres, das que por desgraza, só unha pasará a engrosar a estadística da violencia de xénero. Este desgraciado, deixou a unhas criaturas nun mesmo feito sen nai, avoa e tía, pero aínda o máis grave é que o fixo en presenza dos seus fillos, que iso fai que o acontecemento sexa aínda máis grave”, dixo, engadindo o desexo de que “este minuto de silencio sexa o último do ano, querémonos libres, querémonos vivas, pero en ningún caso vamos a dar un paso atrás nesta loita”.
Para rematar Elvira Lama anunciou que dende a alcaldía se convoca os veciños a unha concentración mañá día 18 as 20h. na praza Carlos Casares en repulsa destes crimes, igual que se vai facer en outros Concellos de Galicia.