Con palabras de agradecemento aos adegueiros poñíase en marcha a XIV Feira do Viño de Monterrei na tarde do 9 de agosto na Praza da Alameda de Verín. A presidenta desta Denominación de Orixe, Lara Da Silva, dedicáballes un forte aplauso, despois de ter unha lembranza especial para a adega Valderello, que tiña prevista a súa asistencia á feira pero “por motivos da vida, non puido ser”.
Deseguido, Da Silva facía unha positiva valoración do momento actual que vive o sector produtivo desta zona ourensá. “Por fin podemos sorrir e mirar cara o futuro con máximos históricos de produción de 5,6 millóns de quilos, superando nun millón de quilos á campaña do 2015”. Ademais neste acto inaugural da mostra referíase ao futuro do viño na comarca de Monterrei, destacando a súa rendabilidade. “Cada ano a nosa D.O. sube, seguimos exportando polo noso produto diferenciado e pola nosa calidade no produto e na nosa xente”, subliñaba.
A presidenta da D.O. Monterrei iniciaba un turno de intervencións no que logo seguía o alcalde de Verín, Gerardo Seoane, quen lembraba que este municipio é coñecido “por ser terra de viño e de auga, e é necesario coidar deles”. Logo falaban o presidente da Deputación, Manuel Baltar, e o conselleiro do Medio Rural, José González. Finalmente, tomaba a palabra o pregoeiro desta edición, o actor Rubén Riós, quen compartía cos asistentes a experiencia da primeira vez que tomaba un viño.
Tras o pregón dábase paso ao tradicional percorrido das autoridades polo recinto feiral no que durante esta fin de semana poderán catarse os viños de 16 adegas: Abeledos, Crego e Monaguillo, Fragas do Lecer ( Boo Rivero), Daniel Fernández, Franco Basalo, Gargalo, Ladairo, Tapias Mariñán (Pazo Blanco Núñez), Pazo de Valdeconde, Pazo dás Tapias, Quinta do Buble, Quinta Soutullo (Fausto Rivero), Terras do Cigarrón, Trasdovento e Triay.
O programa continuaba coa imposición de medallas a catro novos membros da Confraría dos Viños de Monterrei na Igrexa Parroquial de Verín: Paula Vázquez Rocha (técnica de viticultura da Oficina Agraria Comarcal), Luis Cid Congil (periodista e impulsor do Museo Claustro Mercedario de Verín, que conta cunha área dedicada á D.O. Monterrei), monseñor José Leonardo Lemos Montanet (bispo de Ourense) e Manuel Baltar Blanco (presidente da Deputación de Ourense). O concerto do Consorcio na Praza Maior poñía o broche a esta primeira xornada da feira.
A mostra prosegue na fin de semana, tanto o sábado 10 como o domingo 11, coa posibilidade de catar os viños de Monterrei e a súa gastronomía, así como con novas actividades, facendo especial fincapé na música. Así neste domingo 11 de agosto ás 21:30 horas, a Praza da Alameda acollerá a actuación do grupo de folk tradicional Leilía, que presenta o seu novo disco “CantarElas”, aunando temas emblemáticos con temas pouco coñecidos co toque actual da agrupación.
A XIV Feria do Viño de Monterrei está sendo organizada polo C. R.D.O. Monterrei e polo Concello de Verín, coa colaboración da Xunta, Deputación de Ourense, Ministerio de Agricultura, Pesca e Alimentación, Fondo Europeo Agrícola de Desenvolvemento Rural (FEADER), e concellos de Oímbra, Monterrei, Castrelo do Val, Riós e Vilardevós.
Fotos: Carlos G. Hervella
