Ao longo deste mes poderá visitarse na sala de exposicións da Casa da Cultura de Quiroga unha exposición da obra pictórica da artista local Luz Moscoso. Nesta mostra a creadora toma como punto de partida fotos realistas de figuras humanas, animais e cadros clásicos. Sen abandonar o compoñente figurativo orixinal, transfórmao con técnica informática e posteriormente plásmao en impresión glicée sobre lenzo.
O resultado desta técnica non evoca a súa orixe fotográfica, senón que é eminentemente pictórico. Algúns cadros superpoñen técnicas mixtas clásicas a este proceso.
Trátase dunha obra en pequeno formato, aínda que a artista desenvolve tamén outra liña de traballo, pintura en formato grande e orientada á abstracción.
