Por segundo ano consecutivo, Petín converteuse por un día no centro automobilístico da comarca de Valdeorras da man de La Granja Racing, un grupo de amigos afeccionados ao motor e o mundo dos rallyes, que decidían organizar unha quedada para a segunda fin de semana do mes de xullo.
A xornada comezaba en torno ás once da mañá do sábado 9 de xullo coa apertura de inscricións e non remataba ata altas horas da noite, incluíndo xantar, cea, espectáculo sobre catro rodas e música ambiente.
“Todo foi segundo o previsto e tivemos máis coches dos que esperabamos”, aseguran dende a organización, adiantando que foron máis de 250 os coches que se achegaron ata o Campelo (antes de chegar a Mones), onde ao longo da tarde tivo lugar a xuntanza. Alí, os máis atrevidos derraparon, queimaron roda e fixeron soar os tubos de escape dos seus preparados coches. Os demais, conversaban ou simplemente disfrutaban do espectáculo. “Penso que todos quedaron contentos e esperamos que haxa, non só unha terceira edición, senón moitas máis”, di Breo satisfeito co resultado.
O programa da II KDD Racing incluíu premios para o coche máis baixo, o máis ruidoso, o máis antigo, o máis afastado; e tamén para o grupo máis numeroso, para o mellor Traccc. del. en pista e para o mellor TT/4×4 en pista. Trala cea, a festa remataba na praza de Petín ao son da disco-móbil STUU.
