Unha actividade lúdica e participativa, de ocio saudable ao aire libre, é o que ofrecen o Centro Sociocomunitario de Viana do Bolo e Cruz Vermella Viana Conso Frieiras, unidas para organizar un acto interxeracional previsto para este xoves 20 de xullo.
A partires das 20h. a praza Maior de Viana acollerá unha exhibición de baile latino, así como tres máster class de diferentes disciplinas (zumba, pilates e tai chí), e malabares para os cativos. As máster class serán impartidas por dúas monitoras con experiencia que animarán a todos os participantes, logrando unha xornada diferente.
Tal como explican dende o Centro Sociocomunitario, a actividade é totalmente gratuíta e está aberta a todas as persoas que queiran participar, prestando especial atención aos maiores acompañadas dos seus netos, fillos e amigos.
Esta actividade, na que colaboran o Concello e o Centro de Información á Muller (CIM) de Viana do Bolo, vai encamiñada a fomentar as relacións entre persoas de diferentes grupos de idade “co ánimo de enriquecer os vínculos e o coñecemento mutuo”; e tamén promover a actividade física “como elemento clave na promoción da saúde e prevención de enfermidades”.
