“Na Confederación Empresarial de Ourense (CEO) estamos plenamente comprometidos co emprendemento, proba diso é a celebración desta feira, un evento que organizamos da man da Rede Eusumo e co apoio da Xunta de Galicia”.
Deste xeito comezaba a presidenta da CEO, Marisol Nóvoa, a súa intervención na mañá do 20 de setembro na inauguración da Feira Cooperativismo “Conecta co teu público”, na que quince proxectos de economía social exhiben os seus produtos e servizos no Centro Cultural Marcos Valcárcel. Neste acto estaba acompañada polo presidente da Deputación de Ourense, Manuel Baltar, e pola xefa do servizo de Emprego e Economía Social de Ourense, Pilar Fernández.
“Esta será unha oportunidade excepcional para que os emprendedores testen os seus produtos e servizos e tamén será unha plataforma para darse a coñecer e conseguir así novos clientes”, sinalaba Nóvoa, que tamén puxo en valor o desenvolvemento doutros proxectos relacionados co emprendemento.
Percorrendo a mostra poden verse postos de castañas (como é o caso do da Cooperativa Amarelante de Manzaneda), galletas, marmeladas, aceites, queixos ou servizos audiovisuais e educativos.
Fotos cedidas pola CEO.
