Apenas un mes despois da súa toma de posesión como alcaldesa de Vilariño de Conso, Melisa Macía vén de reunirse na mañá do 4 de setembro co presidente da Deputación de Ourense, Manuel Baltar, no Pazo Provincial. Nesta xuntanza abordáronse temas de cooperación en materia de infraestruturas e turismo, coincidindo neste eido en seguir potenciando a riqueza natural e do patrimonio histórico-artístico deste concello do oriente ourensán.
Ademais, analizaron a importancia económica que para Vilariño de Conso ten o aproveitamento hidroeléctrico, ámbito no que Manuel Baltar é vicepresidente da Federación Nacional de Asociacións e Municipios con Centrais Hidroeléctricas e Encoros, que agrupa a un milleiro de concellos de España –entre eles Vilariño de Conso- e ten como obxectivo avanzar nas melloras medioambientais, económicas, de seguridade e de desenvolvemento social das comarcas onde están situadas presas e embalses.
