Ante as elevadas cifras de incidencia de infección por Covid-19 na poboación da provincia, “e tendo sido detectados casos positivos en pacientes sometidos ao proceso de tratamento de hemodiálise, a Área Sanitaria de Ourense, Verín e O Barco de Valdeorras procedeu a habilitar senllas quendas específicas de atención a estes pacientes, tanto no Hospital Universitario de Ourense coma no Hospital Público de Verín e no Hospital Público de Valdeorras, de tal xeito que os pacientes poidan recibir a súa atención sen riscos para a saúde doutros usuarios e, no caso dos hospitais comarcais, sen necesidade de seren trasladados ao hospital de referencia”, segundo vén de comunicar o Sergas.
Estas quendas “adaptadas, en todo momento, á comodidade e confortabilidade dos usuarios do servizo de diálise” entrarán en funcionamento a partir de mañá sábado 15 de xaneiro e manteranse activas mentres persista a necesidade, atendendo aos pacientes actuais ou aos que se poidan presentar de agora en diante.