A Consellería de Sanidade vén de confirmar un total de 9 falecementos de persoas diagnosticadas por Covid-19 en Galicia nas últimas horas, unha delas no Hospital Público de Valdeorras. Trátase dunha muller de 91 anos, procedente dunha das residencias de Viana do Bolo e que tiña patoloxías previas. Este é xa o cuarto falecemento que se produce no centro valdeorrés neste mes de novembro. Foi ademais o único falecemento comunicado na provincia de Ourense neste domingo.
Ademais perdían a vida en Galicia outros oito pacientes: un home de 81 anos no Complexo Hospitalario Universitario de Pontevedra, un home de 94 anos e un home de 79 anos no Complexo Hospitalario Universitario de Santiago, unha muller de 83 anos, unha muller de 86 anos, unha muller de 85 anos e unha muller de 81 anos que estaban ingresadas no Complexo Hospitalario Universitario da Coruña e unha muller de 91 anos (prodecente da residencia asisitida do Meixoeiro) no Complexo Hospitalario Universitario de Vigo. Todos eles presentaban patoloxías previas, segundo Sanidade.
