“Nunca antes o Descenso do Sil tivo un dispostivo destas características, penso que o tema da seguridade estivo perfectamente controlado”, destaca o concelleiro de Deportes do Barco, Aurentino Alonso, tras unha exitosa 53ª edición desta proba na que participaban unhas 300 piraguas (individuais e de equipo) na tarde do 14 de setembro.
Para garantir a seguridade en cada un dos tramos desta competición galega duns 7 km de percorrido contábase cun total de 80 persoas. “Delas, 14 eran da Federación de Salvamento Acuático de Galicia en espazos naturais, cun patrón de embarcación, unha moto acuática e sete saídas de emerxencia perfectamente sinalizadasa con pancartas no río Sil para que todos aqueles padexeiros que tiveran problemas souberan por onde saír”, matiza Alonso.
Tamén se contaba coa presenza da Unidade de Drons da Axencia Galega de Emerxencias, Axega, (con dous técnicos e dous dron, que mesmo se usaron para amplificar o sinal das comunicacións) e dun total de 22 efectivos de Protección Civil de Trives, de Manzaneda, de Castro Caldelas, A Rúa, O Bolo e O Barco, coordinados polo responsable de Protección Civil do Barco.
Ademais había un amplo apoio da Garda Civil: unha unidade de Tráfico e dúas unidades de patrullas, un helicóptero, o GREIM (o Grupo de Rescate e Intervención en Montaña de Galicia, con sede en Trives) e os GEAS (Grupo Especial de Actividades Subacuáticas).
Do operativo tamén formaban parte o Grupo de Emerxencias Supramunicipal (GES) Valdeorras, a Policía Local do Barco e Ambulancias Sil, con dous médicos e un hospital de campaña instalado no Paseo do Malecón.
“Nesta edición só houbo incidentes menores como algún rasguño e todo funcionou perfectamente, estaba todo moi controlado. É certo que nos custou chegar ata onde estabamos pero agora podemos presumir de que está é unha proba coa seguridade garantida. De feito as persoas que veñen a competir de fóra dicíannos que en ningún dos lugares nos que van a regatas viron un despregue como este”, resalta o concelleiro de Deportes do Barco.
Para esta proba o Concello do Barco redactaba un plan de seguridade, tal e como xa se viña facendo en anos anteriores, se ben nesta ocasión “mellorouse e perfeccionouse en base a detalles que nos foron indicando os técnicos noutras edicións”, comenta Aurentino Alonso, que resalta a espectacularidade de tramos do descenso como o do Cachón, polo que “é unha proba moi bonita, pero tamén coa seguridade garantida. Creo que estamos no top ten deste tipo de descensos e iso temos que empezar a dalo a coñecer aos clubs e ao público”.
O concelleiro de Deportes barquense agradecía a colaboración de todas as entidades e persoas que colaboraron nesta edición e tamén os labores de limpeza integral do río que acometía previamente a Confederación Hidrográfica Miño-Sil, xunto aos desbroces do Concello.
Fotos: Carlos G. Hervella/ A.R.
Máis información e fotos:
https://osil.info/o-barquense-jesus-rodriguez-reina-novamente-no-descenso-do-sil/
https://osil.info/o-fluvial-barco-suma-cinco-podios-no-53-descenso-do-sil/
https://osil.info/o-publico-toma-o-rio-para-seguir-o-53-descenso-do-sil/
https://osil.info/os-fotografos-tamen-se-apuntan-ao-descenso-do-sil/
https://osil.info/o-tren-fluvial-do-descenso-do-sil-sae-da-estacion-do-barco/
