Ata en tres categorías se subían ao podio os atletas do Club Adas Proinor no VII Campionato de Galicia Sub10 (BEN) – Sub12 (ALE) e Sub14 (INF) por equipos, celebrado en Lugo o 12 de maio. Así os valdeorreses facíanse co subcampionato autonómico en alevín masculino, co terceiro posto en benxamín masculino e en infantil masculino.
Ademais quedaba no quinto lugar o equipo benxamín feminino e nun sexto posto o infantil feminino. As alevíns situábanse na 12ª posición. “Os nosos pequenos e pequenas fixeron un excepcional campionato conseguindo subir ao podio en tres das súas categorías. Foi unha cita na que estiveron acompañados por dous grandes do noso atletismo: Abel Antón e Fermín Cacho”, destacan dende o Adas. Ademais o club valdeorrés resalta que moitos dos atletas conseguían “mellorar as súas marcas persoais” e outros “quedaban entre os mellor clasificados das súas probas respectivas”.
Fotos: Club Adas Proinor.