Novo podio no que vai de fin de semana para o Club Adas do Barco. Se na xornada do 1 de febreiro colleitaba ata once metais, tanto por equipos como individuais, no campionato provincial de campo a través-Xogade, neste domingo este club valdeorrés volvía a brillar, pero desta volta nas categorías de veteranos.
O equipo masculino do Adas (composto por José Manuel Fernández, Ricardo Vázquez, Manuel Enrique Estévez e José Manuel García) facíase co ouro na categoría M45 no Campionato de España de medio maratón que se desenvolvía en Porto Sagunto (Valencia), cun tempo de 3:42:03.
Tamén destacaba nesta competición o terceiro posto en categoría absoluta de Alberto Sánchez (1:03:38), así como os quintos postos absoluto e máster do equipo feminino do Adas nesta mesma cita.