Degustación de viños percorrendo as “Tabernas de Baco”, postos de gastronomía e artesanía, xogos populares e didácticos, así como actuacións musicais para todos os gustos. Son os ingredientes cos que se elaborou a VI edición da Baco Festa que se celebrará esta fin de semana no Aguillón da Rúa.
A festa inaugurarase mañá, venres 9 de agosto ás 20h. na ponte da Cigarrosa onde as autoridades da Rúa recibirán ás de Petín para, xuntos, inaugurar o recinto feiral. Ás 22:30h. serán as Xornadas de Folclore e a continuación a actuación de Thunderstuck, banda tributo a AC/DC. Para o sábado están previstas as actuacións do grupo local Blue Star (21h.) e da banda tributo a Miguel Ríos, Rock & Ríos (23:30h.); e para o domingo pola tarde, a de Fanfarria Takikardia.
O horario do recinto, tanto o sábado coma o domingo será de 12:30h. a 14:30h. e de 19:30 ata o remate, e nel reuniranse unha docena de adegas, así como os stands da Ruta do Viño, do Camiño de Inverno e de Almendralejo; unha decena de artesáns (locais e de fóra) e os tradicionais postos de comida e de gofres e crepes.