O Centro Cultural de Esgos acollía o 20 de xullo a sesión plenaria de organización do Consorcio de Turismo Ribeira Sacra, tras as elecciós municipais. Nela decidíanse os novos cargos de presidente e vicepresidente, para os que resultaban elixidos, por unanimidade, o alcalde de Sober e o de Nogueira de Ramuín, respectivamente.
O rexedor de Sober, Luis Fernández Guitián, agradecía o apoio dos 21 concellos participantes na reunión, así como do Consello regulador da DO Ribeira Sacra e comprometíase a facer un traballo “serio e responsable” para que o Consorcio siga sendo un dos organismos de referencia para a Ribeira Sacra e, sobre todo, para impulsar a candidatura ante a Unesco para que a zona sexa declarada Patrimonio da Humanidade.
Ademais de agradecer o traballo do anterior equipo, comprometíase a estudar a proposta de que a sede deste organismo se traslade a un lugar fixo, tal e como propuxo o rexedor de Monforte. Acordouse tamén remitir a todos os concellos e asociacións o material (elaborado polo equipo de técnicos seleccionados polo Valedor do Pobo e financiado polas Deputacións de Ourense e Lugo) sobre a candidatura a Patrimonio Mundial que se deu a coñecer o sábado 18 de xullo en Esgos para que todos os interesados e interesadas poidan facer achegas e suxestións.
Tras o pleno, tiña lugar unha xuntanza da Comisión de Seguimento para a Candidatura de Patrimonio da Humanidade. Nela decidíase ceder a presidencia á Deputación de Ourense.