O alcalde de Viana convida a Dolce & Gabanna a visitar o Entroido deste concello

Vén de enviarlle unha carta á empresa na que lle transmite o malestar dos veciños pola similitude entre as camisas da súa colección primavera-veran 2018 e a que leva tradicionalmente Boteiro e pídelle que se recoñeza a “orixe da inspiración”

Boteiros durante o desfile do Domingo Gordo en Viana do Bolo./ Foto: Mónica G. Bellver.

No marco da polémica suscitada en Viana do Bolo ao difundirse unha imaxe dunha prenda da colección primavera- verán de Dolce & Gabana cun notable parecido coas que levan os Boteiros do Entroido deste municipio (e tamén os do veciño Vilariño de Conso), o alcalde vianés, Secundino Fernández, vén de enviarlle unha carta a esta empresa.

Na súa misiva, explícalle a localización de Viana do Bolo e tamén lle fala da riqueza das súas tradicións, entre elas o seu Entroido. Dentro del “a figura emblemática é o Boteiro”, que constitúe “un ben cultural e é o sinal de identidade máis importante do noso concello. Trátase dun capital cultural intanxible e dun coñecemento cultural colectivo que se transmite de xeración en xeración, do que nos sentimos orgullosos e que respectamos como o que é, a nosa cultura”.

 

O alcalde de Viana do Bolo, Secundino Fernández./ Foto cedida.

 

Ademais, o rexedor vianés refírese á gran similitude do vestiario dos modelos presentados na colección primavera-verán de Dolce & Gabanna coa camisa que viste tradicionalmente o Boteiro. “Tódalas veciños e veciñas que viven o Entroido e o senten quedaron perplexos ao observar as imaxes das modelos con eses traxes de Boteiro na pasarela. Non só polo seu colorido, senón tamén polo seu deseño de figuras e pola forma de facelas (cintas de raso plisadas e “fruncidas”). O desgusto da veciñanza foi grande cando nin tan sequera se mencionou a orixe da “inspiración”. Non se mencionou nin se recoñeceu esa figura centenaria, nin ás artesás que elaboran as camisas e que mantiveron esa tradición, que pasa fundamentalmente de nais a fillas”.

É por iso que o alcalde demándalle á empresa na súa carta que “se recoñeza publicamente que é o noso Boteiro a fonte de inspiración dos seus deseños”. Ademais convida a Dolce & Gabanna a visitar Viana, “sobre todo, no Entroido” para que “puideran admirar en directo a beleza, a forza, a espectacularidade, a emoción que envolve ao noso entroido e a súa principal figura: O Boteiro”.

Ademais, “e como feito de desagravio e como mostra de hospitalidade, convidámolos a mostrar esas creacións inspiradas no Boteiro en Viana do Bolo. Ofrecémonos a que eses modelos poidan desfilar polo noso precioso casco histórico, no entorno natural e cultural do Boteiro”, conclúe o alcalde de Viana na misiva remitida á empresa.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies