“Estou absolutamente tranquilo. Nós podémonos equivocar, pero non temos nada que ocultar, nin sequera ocultamos os nosos erros”. Eran as palabras do alcalde do Barco, o socialista Alfredo García, na mañá do 21 de outubro, minutos antes de entrar a declarar no xulgado da vila, tras a denuncia presentada polo PP do Barco contra el por presuntos delitos de prevaricación e malversación. Acudía acompañado dos concelleiros do equipo de goberno barquense, do alcalde de Petín, do coordinador comarcal do PSOE na comarca de Valdeorras e doutros representantes socialistas.
“Está claro o que pretende o PP, o PP conseguiu levar o debate político ao xulgado. Eu voulle dicir ao xuíz todo o que me pregunte e estou tranquilo evidentemente porque aválame o convencemento de que, aínda que houbese erros administrativos, non houbo ningún tipo de delito, que son cousas distintas. Pero se se decidíu levar o tema á xustiza, primeiro ten que falar a xustiza”, sinalaba Alfredo García.
Con respecto aos 2.648 reparos técnicos efectuados á xestión do alcalde barquense durante o periodo 2003-2013 que o PP do Barco presentaba ante a Fiscalía en Ourense o pasado 16 de outubro, Alfredo García sinalaba que, “como isto acabábase xa ou había visos de que se acababa, entón meten máis cousas para ver se conseguen que isto continúe e haber se, con sorte, se chega aínda ás eleccións municipais con que o alcalde do Barco está imputado”.
