O alcalde popular rues terá dedicación parcial e unha das súas edís dedicación exclusiva

Así se aprobaba no pleno de organización, cos seis votos a favor do PP e do RUA e cos cinco votos en contra da oposición do BNG e do PSdeG-PSOE

Na tarde do 11 de xullo a Corporación da Rúa, que preside o popular Álvaro Fernández, celebraba o pleno de organización para esta nova lexislatura. Entre os puntos da orde do día figuraban o reparto de concellerías, que serán un total de seis, das cales cinco corresponderánlle ao PP e a restante do RUA, despois do acordo que asinaban as dúas formacións políticas unhas horas antes.

O reparto de concellerías será o seguinte: Economía e Facenda será ocupada por Teresa Varela; a área de Urbanismo, Obras e Mantemento será asumida polo alcalde; Raúl Yáñez levará Medio Ambiente, Desenvolvemento Rural e Patrimonio, e, finalmente Joana Gómez ocuparase dúas concellerías: as de Sanidade, Servizos Sociais e Igualdade e a de Persoal, Emprego e Réxime Interior. Ademais o independente José Vicente Solarat será o edil de Cultura, Turismo e Deportes. A xunta de goberno local estará formada polo alcalde máis tres concelleiros: Teresa Varela (que será a primeira tenente de alcalde), Joana Gómez (segunda tenente de alcalde) e José Vicente Solarat.

 

O alcalde rues Álvaro Fernández.

 

Un dos puntos que suscita especialmente o debate era o da dedicación parcial do alcalde e o da dedicación total da concelleira popular Joana Gómez. A dedicación parcial do alcalde será de 23 horas e media á semana e suporá un gasto para o Concello de 31.824 euros ao ano, mentres que a dedicación total da edil implicará un gasto anual de 22.100,40 euros.

Este punto saía adiante cos votos a favor do PP (4) e do RUA (2), mentres que os tres edís do BNG e os dous socialistas votaban en contra. No caso do BNG, a súa voceira municipal, María Albert, argumentaba o seu voto en contra sinalando que hai un par de días o alcalde falaba “dunha débeda inasumible para o Concello e mesmo de que habería que pedir axuda externa e agora o primeiro que fan é duplicar o número de dedicacións do Concello. O anterior alcalde, Luis Gudiña, non cobraba nada do Concello en concepto de salario e a partida destinada a gastos de persoal estaba completa, pero esta situación non vai ser a mesma no exercicio que vén. De 41.000 euros dunha partida de salarios pasamos a 54.000 euros, é un 37% máis de custo para o Concello”, dicía a concelleira nacionalista.

De xeito similar se manifestaba o voceiro socialista, Luis Fernández Gudiña. “Votamos en contra por coherencia”, indicaba, “se no anterior goberno tiñamos unha dedicación exclusiva, non podemos apoiar agora unha parcial e outra exclusiva. O PP presenta unha incongruencia cando está na oposición e cando goberna, fala dunha gran débeda, pero a súa primeira medida é incrementar o gasto para os próximos catro anos”.

O alcalde rues defendía a súa proposta e indicaba que a dedicación “parcial é simplemente a nivel institucional pero a dedicación real é total, non se vai limitar ao horario laboral que se establece. Con relación á concelleira, ela vai ter dedicación exclusiva porque o Concello así o require, repectamos o teito de gasto e se houbera que tomar algunha medida e rectificar, rectificaríamos”.

Pola súa banda, José Vicente Solarat, voceiro do RUA, tamén afirmaba que “este é un acordo de retribución para este exercicio, é posible que teñamos que rectificar as partidas e isto non ten efecto retroactivo, será a partir de hoxe”.

Durante a sesión tamén se aprobaban, entre outros puntos, as comisións informativas, a súa periodicidade e membros, así como as sesións plenarias ordinarias, que se celebrarán o primeiro luns de cada mes impar ás 20:15h.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies