Este xoves, 17 de novembro, ás sete da tarde inaugúrase no Ateneo de Ourense a exposición “Manuel Mª, beleza, amor e compromiso (1929-2004)”. Unha mostra que aborda, dun xeito ameno e gráfico, a personalidade do autor e a evolución da súa obra ao longo das distintas etapas vitais.
A identificación do poeta coa terra e a paisaxe, o seu compromiso coa lingua galega, a súa faceta de clásico e precursor da vizosa literatura infantil galega da que hoxe gozamos, a súa participación na vida política, a súa poesía intimista ou a variedade de xéneros literarios son algúns dos aspectos nos que afonda a mostra, enmarcada na programación de actividades conmemorativas das Letras Galegas 2016 posta en marcha pola Xunta e pola Casa-Museo Manuel María.
A exposición permaneceá aberta ata o vindeiro 30 de novembro para “difundir a traxectoria vital e literaria do poeta da Terra Chá”, explican dende o Ateneo.