Héctor Daniel Olivera Campos, de Badía del Vallés (Barcelona), vén de ser declarado ganador da novena edición do Concurso de Microrrelatos de Parada de Sil, co traballo titulado “Metales pesados”. O xurado integrado por Antonio Carreño, catedrático emérito da Brown University; Arturo Fernández, catedrático emérito de Lingua española; e Delfín Caseiro, escritor e inspector de Educación, concedeu o segundo premio ó microrrelato “De ollos do pasado”, da autora chantadina Catarina Cortizas Leira, en tanto que o terceiro recaeu no traballo de “Amo a mi Sil”, de Luis Gispert Macián, de Segorbe (Castellón). Os membros do xurado destacaron a alta participación no certame, así como a calidade de moitos dos traballos.
Neste senso, o concelleiro de Cultura de Parada de Sil, Francisco Magide, abondou no número de microrrelatos presentados, “que certifican a consolidación do certame dentro do panorama literario español, cunha participación que implica un traballo ímprobo para os membros do xurado, aos quen en nome do Concello lles agradezo o seu traballo pola adicación que esixe e polo feito de que fan de xeito altruísta”. Magide suliñou tamén o feito de que “por vez primeira se recibiron obras procedentes dos cinco continentes, feito que apuntala tamén como o premio ten traspasado fronteiras, chegando ós rincóns máis insospeitados grazas ás novas tecnoloxías”.
Tradicionalmente, o premio era entregado na xornada que o concello adica cada ano a Festa das Letras Galegas, na que ademais da persoalidade da data, acostuma homenaxearse a a algún persoeiro destacado que sexa natural de Parada ou que estea vencellada a este concello. Neste caso, debido ás dificultades para este tipo de actos polas restricións derivadas da pandemia, a homenaxe das Letras quedou adiada, polo que -como xa suxedera o ano pasado- a entrega de premios do concurso de microrrelatos terá lugar nun acto específico no salón de plenos co concello de Parada, presidido polo alcalde Aquilino Domínguez, nunha data que será dada a coñecer a próxima semana.