Incentivar as compras, celebrar o Día dos Namorados, fomentar o deporte, e favorecer o coñecemento das rutas que existen ao longo da villa. Son as premisas coas que a Asociación Centro Comercial Aberto O Barco preparou a campaña “O Barconamora” que neste 2020 recupera a carreira e andaina por parellas, que cumpre a súa VIII edición e que plantexa aos participantes completar o percorrido estipulado unidos por un lazo atado aos pulsos.
Trátase dunha proba organizada en colaboración coa delegación valdeorresa da FGA e o Club Adas Proinor, que se celebrará o domingo 16 de febreiro, a partir das 11:30h. (andaina) con saída e meta na praza José Otero. Con respecto ás modalidades haberá tres: parellas mixta, masculina e feminina, na categoría absoluta, cun percorrido urbano de 7,5 km. Tamén haberá carreiras para as categorías base (prebenxamín, sub10, sub11 e sub14) con percorridos que van dos 1.000 aos 100 metros polo Paseo do Malecón. Como novidade nesta edición, todas as carrerisa se celebrarán ao mismo tempo, a partir das 12h.
En canto aos premios, haberá trofeos para as tres primeiras parellas de cada modalidade na categorías absoluta; medallas de chocolate para os pequenos que se suban ao podio; e agasallos para todos os nenos. Ademais, realizarase un sorteo entre todos os participantes con produtos doados polos comercios asociados.
As inscricións poderán realizarse, do 3 ao 13 de febreiro, na páxina web www.carreirasgalegas.com, nas tendas Foot on Mars do Barco e Tri-Sport da Rúa, nas oficinas do Centro Comercial Aberto (Rúa España, nº 1) e unha hora antes da proba.
A presentación do evento tiña lugar na mañá do 31 de xaneiro na oficina do CCA o Barco, coa presenza da vicepresidenta da asociación Ángeles Rodríguez; da representante da delegación de atletismo Mireia Rodríguez; e do presidente do Adas, Tinín González. No acto a vicepresidenta do CCA engadiu que como vén sendo habitual, a asociación de comerciantes pon en marcha o sorteo para “premiar aos clientes dos establecementos asociados con catro ceas para catro parellas” a desfrutar na Casa Galaica, Fernando III, Pensión La Gran Tortuga e Piquiño, o 7 de marzo. Do 3 ao 16 de febreiro, os comercios participantes naa campaña repartirán coas compras 6.000 boletos entre os seus clientes que deberán cubrir cos seus datos para poder participar nosorteo, que se celebrará o 19 de febreiro na oficina do Centro Comercial Aberto.
O presidente do Adas pola súa banda, asegurou estar contento pola recuperación da orixinal carreira que “e sobre todo popular”, engadindo que O Barco foi pioneiro na súa organización, esperando que participe moita xente. Con respecto ao circuíto, aumentaron de 5 a 7,5 km o percorrido que varía algo con respecto ás anteriores edicións.
Fotos: Mónica G. Bellver